Keron Development Fund-ը, Z&A ընկերությունը և Maison Marom-ը հայտարարեցին 20-րդ դարասկզբի ճարտարապետական հուշարձան հանդիսացող եզակի շենքի վերակենդանացման ծրագրի մեկնարկի մասին, որը գտնվում է Երևանի կենտրոնում՝ փ. Աբովյան 3։
«Մեր նպատակն է պահպանել այս եզակի շենքի պատմամշակութային արժեքը՝ միաժամանակ ստեղծելով նորարարական տարածքներ արվեստի և նորաձևության համար: Նախագծի մանրամասները կներկայացնենք առաջիկայում»,- ասվում է հաղորդագրության մեջ։
Ավելի վաղ Հայաստանի պետական գույքի կառավարման կոմիտեն ամփոփել էր պատմական այս շինության վարձակալության մրցույթի արդյունքները։ Մրցույթում հաղթել է հայկական Z&A ընկերությունը, որին պատկանում է արևմտյան բրենդային հագուստի խանութների ցանցը։ Սա մայրաքաղաքի պահպանված ամենագեղեցիկ շենքերից է։ Բժիշկ Հովհաննես Հովհաննիսյանի տունն ավելի հայտնի է որպես «ԱՕԿՍ շենք»։ 1944 թվականից այստեղ է գտնվում Արտասահմանյան երկրների հետ մշակութային կապերի հայկական ընկերությունը։ Նախկինում շենքը սեփականաշնորհվել է։ Քրեական գործի հարուցումից հետո շենքի սեփականատերերը համաձայնել են այն վերադարձնել պետությանը։ Մրցույթը հայտարարվել է այն պայմանով, որ վարձակալը չի փոխի շենքի պատմական տեսքը։
