ՀՀ հակակոռուպցիոն կոմիտեն հայտնում է, որ ավարտվել է քրեական վարույթը, որի շրջանակում նախկին փոխվարչապետին մեղադրանք է ներկայացվել առանձնապես խոշոր չափերով ապօրինի գույքի օրինականացման (փողերի լվացման) համար։
Ըստ քննության տվյալների՝ պաշտոնյան 2000-2018 թվականներին զբաղեցրել է ՀՀ նախագահի առաջին օգնականի, աշխատակազմի ղեկավարի, ԱԱԽ քարտուղարի, տարածքային կառավարման նախարարի, ինչպես նաև փոխվարչապետի պաշտոնները։ Այդ ընթացքում, ըստ վարույթի, նա հանցավոր ճանապարհով ստացված ավելի քան 4.9 միլիարդ դրամի գույք է օրինականացրել՝ այն գրանցելով իր մերձավորների անունով։
Գլխավոր փաստեր՝
- Գրանցվել է 39 անշարժ գույք՝ Երևանում և ՀՀ մարզերում,
- Չեխիայում՝ ևս 10 անշարժ գույք,
- Շուկայական արժեքը գերազանցել է հայտարարագրվածը՝ 4.8 մլրդ դրամից ավելի,
- Շրջանառվել են նաև բանկային գործարքներ՝ եկամուտների հետ անհամեմատ գումարներով։
Քրեական գործը կներկայացվի դատարան՝ համապատասխան մեղադրական եզրակացությամբ։
