Գլխավոր դատախազության կողմից՝ ապօրինի ծագում ունեցող գույքի բռնագանձման գործառույթի շրջանակում, 2025 թվականի հունիսի 23-ին կնքվել է հաշտության համաձայնություն ՍՊ «Սթոնս» ընկերության ղեկավար Սուրեն Ավագյանի և նրա փոխկապակցված անձանց հետ։ Հաշտության համաձայնությամբ, վերջիններս պարտավորվել են Հայաստանի Հանրապետությանը վերադարձնել ընդհանուր 87 միլիոն 622 հազար դրամ՝ մոտ 227 հազար դոլարին համարժեք գումար։

Հաշտության համաձայնությունը հունիսի 26-ին հաստատվել է Հակակոռուպցիոն դատարանի կողմից։ Ըստ դրա՝

• 50 միլիոն դրամը կփոխանցվի մեկ շաբաթվա ընթացքում՝ վճռի օրինական ուժի մեջ մտնելուց հետո,

• 37 միլիոն 622 հազար դրամը՝ հաջորդող 12 ամսվա ընթացքում։

Հիշեցնենք, որ 2020-ից իրականացված ուսումնասիրությունների արդյունքում 2023-ի մարտին դատախազությունը դատարան էր ներկայացրել հայց՝ պահանջելով բռնագանձել Սուրեն Ավագյանին պատկանող ապօրինի ծագում ունեցող գույքը։

Հայցի հիմքի փոփոխությունից հետո, որպես բռնագանձման ենթակա գումար ներկայացվել էր.

• 75 մլն դրամ՝ ապօրինի ծագում ունեցող և չհիմնավորված եկամուտներ,

• 347 հազար դրամ՝ չվերադարձված փոխառություն,

• 19.9 մլն դրամ՝ ապօրինի եկամուտների մնացորդ։

Պատասխանողները ընդունել են պարտավորությունը և ներկայացրել հաշտության դիմում։

Վճռի հաստատմամբ պետությունը կստանա խոշոր գումարի փոխհատուցում՝ առանց երկարատև դատաքննության, ինչը դիտվում է որպես նախադեպային և արդյունավետ մոտեցում՝ ապօրինի գույքի վերադարձի գործընթացում։