ԱՄՆ նախկին նախագահ Դոնալդ Թրամփը հայտարարել է, որ իր նախաձեռնությամբ Coca-Cola ընկերությունը համաձայնել է վերանայել իր բաղադրատոմսը և ԱՄՆ-ում արտադրվող ըմպելիքներում օգտագործել շաքարեղեգի բնական շաքար՝ փոխարինելով ներկայում կիրառվող բարձր ֆրուկտոզային եգիպտացորենի օշարակը։ Այս մասին հայտնում է Reuters-ը։

«Ես խոսել եմ Coca-Cola-ի ղեկավարության հետ՝ իրական շաքարեղեգի շաքարի օգտագործման հարցով, և նրանք համաձայնել են։ Շնորհակալություն եմ հայտնում բոլոր պատասխանատուներին», — գրել է Թրամփը Truth Social հարթակում։

Ընկերության ներկայացուցիչը արձագանքել է, որ Coca-Cola-ն շուտով կներկայացնի նոր արտադրանքի մանրամասները՝ նշելով, որ գնահատում են Թրամփի հետաքրքրությունը առողջ սննդի նկատմամբ։

Մինչ այժմ ԱՄՆ-ում վաճառվող Coca-Cola-ի քաղցրությունը ստացվում էր հիմնականում եգիպտացորենից ստացվող օշարակից, մինչդեռ որոշ այլ երկրներում, ինչպես օրինակ՝ Մեքսիկայում, օգտագործվում է շաքարեղեգի բնական շաքար։

Այս փոփոխությունը համընկնում է Թրամփի վարչակազմի «Make America Healthy Again» նախաձեռնության շրջանակում՝ որի նպատակն է խթանել սննդի արտադրության առողջարար բաղադրիչների օգտագործումը՝ բացառելով արհեստական ներկանյութերն ու վնասակար հավելումները։