«Լաբուբու» խաղալիքների ստեղծող և Pop Mart ընկերության տնօրեն, 38-ամյա Վան Նինը, ըստ Bloomberg-ի, ընդգրկվել է աշխարհի 100 ամենահարուստ մարդկանց ցուցակում։ Նրա կարողությունը գնահատվում է 26,5 միլիարդ դոլար, ինչով նա արդեն շրջանցել է «Լուկոյլ»-ի բաժնետեր Վագիտ Ալեկպերովին և PayPal-ի համահիմնադիր Պիտեր Թիլին։ Նինը վարկանիշում զբաղեցնում է 85-րդ տեղը։

Միայն վերջին մեկ տարվա ընթացքում նրա կարողությունը աճել է մոտ 20 միլիարդ դոլարով։

Վերջերս Pop Mart ընկերությունը հայտարարել է «Լաբուբու» խաղալիքների մինի տարբերակների թողարկման մասին, ինչն էլ խթանել է ընկերության բաժնետոմսերի արժեքի աճը։ Ըստ տվյալների՝ 2025 թվականի առաջին կեսին միայն Wildberries առցանց հարթակում ռուս օգտատերերը «Լաբուբու» խաղալիքների վրա ծախսել են ավելի քան 2 միլիարդ ռուբլի։