Սեպտեմբերի 1-ից Հայաստանում կգործի ժամանակավոր անաշխատունակության և մայրության նպաստների հաշվարկման, նշանակման և վճարման նոր էլեկտրոնային համակարգ։ Այն մշակվել է ԱՍՀ նախարարության «Նորք» տեխնոլոգիաների կենտրոնի կողմից և միավորում է Առողջապահության նախարարության ու Պետական եկամուտների կոմիտեի տեղեկատվական շտեմարանները։
Նոր կարգավորումների համաձայն՝ թղթային անաշխատունակության թերթիկները ամբողջությամբ դուրս են գալիս գործածությունից։ Անաշխատունակության կամ մայրության արձակուրդի դեպքում քաղաքացին բժշկական կազմակերպությունում ստանալու է էլեկտրոնային թերթիկ, որը անմիջապես հասանելի կլինի Միասնական սոցիալական ծառայությանը։
📌 Հիմնական փոփոխությունները․
- Անաշխատունակության տվյալները ավտոմատ կերպով կփոխանցվեն ՊԵԿ-ին և գործատուին։
- Թերթիկը փակելուց հետո նպաստի հաշվարկման համար անհրաժեշտ եկամուտների տվյալները ՊԵԿ-ը ինքնաշխատ եղանակով կհաղորդի համակարգին։
- Նպաստը կվճարվի բացառապես անկանխիկ եղանակով՝ քաղաքացու կողմից ընտրված բանկի միջոցով։ Եթե քաղաքացին հաշվարկվող բանկում հաշիվ չունենա, կբացվի հատուկ «միանվագ վճարների» հաշիվ։
- Չաշխատող անձանց մայրության նպաստները ևս կնշանակվեն նոր համակարգով։
- Քաղաքացիները իրենց նպաստի և հաշվարկների մանրամասներին ծանոթանալու հնարավորություն կունենան e-social.am-ում՝ նույնականացում անցնելուց հետո։
Միասնական սոցիալական ծառայություն դիմում կներկայացվի միայն հատուկ դեպքերում՝ մահվան, դատական ակտի կամ սահմանափակ օգտագործման տվյալների առկայության դեպքում։
Մինչ այժմ անաշխատունակության թերթիկները քաղաքացիները ներկայացնում էին գործատուին, որն էլ հաշվարկում և վճարում էր նպաստը։ Նոր համակարգի գործարկումով այս գործընթացը դառնում է ամբողջությամբ էլեկտրոնային և ինքնաշխատ։
