Հայաստանի ֆուտբոլի ֆեդերացիայի (ՀՖՖ) հաղորդմամբ՝ իտալական հայտնի ակումբի՝ «Յուվենտուսի» երեք ակադեմիաներից երկուսը կբացվեն արդեն 2026 թվականին։ Դրանք կգործեն եվրոպական չափանիշներին համապատասխան պայմաններով և ենթակառուցվածքներով։

Ակադեմիաների համալրման նպատակով Հայաստան կժամանեն Եվրոպայից 20 մասնագետ-մարզիչներ, որոնք կզբաղվեն երիտասարդ ֆուտբոլիստների պատրաստությամբ։ Ընդհանուր առմամբ նախատեսվում է, որ երեք ակադեմիաները կհամալրվեն շուրջ 2000 մարզիկով։

Սպասվում է, որ ակադեմիաները կգործեն և՛ վճարովի, և՛ անվճար հիմունքներով՝ կախված սաների ակադեմիական առաջադիմությունից և մարզական արդյունքներից։

ՀՖՖ-ի տվյալներով՝ ամեն տարի ակադեմիայի լավագույն սաները հնարավորություն կունենան մեկնելու Թուրին՝ մասնակցելու «Յուվենտուսի» գլխավոր ակադեմիայի մարզումներին և ընկերական հանդիպումներին։

Այս նախաձեռնությունը, ըստ ֆեդերացիայի, միտված է Հայաստանում ֆուտբոլի զարգացմանը, մանկապատանեկան մարզիկների որակավորման բարձրացմանը և միջազգային համագործակցության ընդլայնմանը։