Հայ վաճառողները 2025 թվականի առաջին ինը ամիսներին զգալիորեն ավելացրել են վաճառքները ռուսական Wildberries առցանց հարթակում։ Ընկերության մամուլի ծառայության տվյալներով՝ հունվար-սեպտեմբերին Հայաստանի վաճառողների արտահանման ծավալները նախորդ տարվա նույն ժամանակահատվածի համեմատ աճել են 164 տոկոսով։

Հայ վաճառողների ապրանքներն առավելապես արտահանվել են դեպի Ռուսաստան, Բելառուս, Ղրղզստան, Ուզբեկստան և Վրաստան։ Ամենախոշոր աճը գրանցվել է Ուզբեկստանի ուղղությամբ՝ 193%, այնուհետև Ղրղզստան՝ 187%, Ռուսաստան՝ 170%, Բելառուս՝ 137%, իսկ Վրաստան և Տաջիկստան՝ կրկնակի աճ։

Արտահանման կառուցվածքում առավել մեծ պահանջարկ են ունեցել հետևյալ կատեգորիաները.

• Խաղային կոնսուլներ և խաղեր՝ +694%,
• Սեղանի և խոհանոցային պարագաներ՝ +204%,
• Կենցաղային տեխնիկա՝ +199%,
• Գեղեցկություն՝ +156%,
• Սնունդ՝ +156%։

Wildberries-ը վերջին տարիներին դարձել է հայ արտադրողների և ձեռնարկատերերի համար արտահանման հիմնական թվային հարթակներից մեկը, ինչը, փորձագետների գնահատմամբ, նպաստում է հայկական ապրանքների ճանաչելիության և շուկայի դիվերսիֆիկացման աճին։