Արագածոտնի մարզում մեկնարկել է «ԱգրոՊրոմ» ընկերության նոր ներդրումային նախագիծը՝ ժամանակակից ջերմոցային համալիրի կառուցում 22 միլիոն դոլարի ներդրումով։ Նախագիծը կյանքի է կոչվում ջերմոցային տնտեսությունների զարգացմանը նպաստող պետական ծրագրի շրջանակում։

Առաջին փուլում նախատեսվում է մշակել 10 հեկտար տարածք՝ լոլիկի արտադրության համար, իսկ ամբողջ համալիրի մակերեսը հետագայում կհասնի 30 հեկտարի։ Ընկերության նպատակն է դառնալ առաջատար արտահանող ռուսական և միջազգային շուկաներում, որտեղ իր արտադրանքի շուրջ 75 տոկոսը կուղղվի արտահանման։

Նախագիծը նաև զգալի սոցիալ-տնտեսական ազդեցություն կունենա տարածաշրջանի վրա՝ ապահովելով 225 նոր աշխատատեղ։

«ԱգրոՊրոմ»-ի ներկայացուցիչների խոսքով՝ նոր ջերմոցը կառավարվելու է արհեստական բանականության համակարգերի և առաջադեմ ագրոտեխնոլոգիաների միջոցով, ինչը թույլ կտա բարձրացնել արտադրողականությունը, նվազեցնել ռիսկերը և ապահովել մշտական որակ։

Այս նախագիծը դիտարկվում է որպես Հայաստանի գյուղատնտեսական արդիականացման և արտահանման ուղղվածության կարևոր քայլ, որը կնպաստի նաև երկրի սննդային անվտանգության ամրապնդմանը։