Երևանի քաղաքապետ Տիգրան Ավինյանի խոսքով՝ մայրաքաղաքի շտապբուժօգնության ծառայության արդյունավետությունն էականորեն բարձրացել է։ Նա նշել է, որ նախկինում գոյացած 141 մլն դրամ վնասից համակարգը տեղափոխվել է 168 մլն դրամ շահույթի, ինչը հնարավոր է դարձել կառավարման բարեփոխումների և նոր գործառնական մոտեցումների արդյունքում։
Ավինյանի հայտարարությամբ՝ շտապբուժօգնությունը ամբողջությամբ վերազինվել է, ենթակառուցվածքներն արդիականացվել են, և իրականացվել է ծառայության ամբողջական թվայնացում։ Նրա խոսքով՝ համակարգը ներկայում գործում է ամբողջությամբ անկանխիկ վճարման մեխանիզմով, ինչը թափանցիկությունն ու հաշվետվողականությունը զգալիորեն բարձրացրել է։
Քաղաքապետը շեշտել է, որ իրականացված փոփոխությունները միտված են քաղաքացիներին ավելի արագ, արդյունավետ և որակյալ շտապ օգնության ծառայություններ մատուցելու նպատակին։
