Պաշտպանության նախարար Սուրեն Պապիկյանը հայտարարել է, որ Հայաստանի զինված ուժերի բոլոր դիրքերը ներկայումս պատշաճ կերպով կահավորված են, իսկ զինծառայողների կեցության պայմանները զգալիորեն բարելավված։ Այս մասին նախարարը նշել է «Հարցնում է քաղաքացին» հաղորդաշարի ընթացքում՝ արձագանքելով դիտարկմանը, թե որոշ դիրքերում զինվորները շարունակում են ծառայել վրաններում և դժվար պայմաններում։
Քաղաքացին նկատել էր, որ որոշ տեղերում զինծառայողները անձրևի տակ են ծառայում, քնում են ոչ հարմարավետ պայմաններում և պետք է ապահովվեն նվազագույն կեցության լիարժեք հնարավորություններով։
Պապիկյանը պաշտոնապես հերքել է նման դեպքերի առկայությունը՝ ընդգծելով․
«Նման նկարագրով բանակային դիրքեր այսօր գոյություն չունեն»։
Նախարարը վստահեցրել է, որ իրականացվել են լայնածավալ աշխատանքներ՝ դիրքերում կեցության, կահավորման և անվտանգային պայմանների բարելավման ուղղությամբ։
