TRIPP նախագծի շրջանակներում Հայաստանի հարավում նախատեսվող նոր՝ 43 կիլոմետրանոց երկաթուղային հատվածը չի լինելու «Հարավկովկասյան երկաթուղիներ» ընկերության սեփականությունը։ Այդ մասին հայտարարել է Ազգային ժողովի արտաքին հարաբերությունների հանձնաժողովի նախագահ Սարգիս Խանդանյանը։

Նրա խոսքով՝ ներկայումս Հայաստանի տարածքում գործող բոլոր երկաթուղային գծերը պատկանում են «Հարավկովկասյան երկաթուղիներին», մինչդեռ նոր կառուցվող հատվածի նկատմամբ այլ մոտեցում է նախատեսվում։

«Երկրում գործող երկաթուղային գծերը «Հարավկովկասյան երկաթուղիների» սեփականությունն են։ «Թրամփի երթուղու» շրջանակներում կառուցվելիք 43 կիլոմետր երկաթուղին կպատկանի TRIPP-ին, որը նախատեսվում է ստեղծել հենց այդ նախագծի շրջանակներում», — նշել է Խանդանյանը։

Նա հավելել է, որ TRIPP-ը հանդես կգա որպես առանձին իրավաբանական և կառավարման սուբյեկտ՝ ապահովելով նոր ենթակառուցվածքի շահագործումն ու կառավարումը՝ նախագծով սահմանված սկզբունքներին համապատասխան։

Նախագիծը դիտարկվում է որպես տարածաշրջանային տրանսպորտային հաղորդակցությունների զարգացման կարևոր բաղադրիչ, որի շուրջ քննարկումները շարունակվում են ինչպես ներպետական, այնպես էլ միջազգային մակարդակներում։