ԱՄՆ նախագահ Դոնալդ Թրամփը հերթական անգամ կոշտ հայտարարություններով է հանդես եկել եվրոպացի առաջնորդների հասցեին՝ կապված Գրենլանդիան Միացյալ Նահանգներին միացնելու շուրջ Սպիտակ տան դիրքորոշման հետ։ Թրամփը քննադատել է Եվրոպական միության ղեկավարներին այն բանի համար, որ նրանք դեմ են արտահայտվում այդ գաղափարին՝ ընդգծելով, որ կղզին ունի առանցքային նշանակություն ԱՄՆ-ի ազգային և համաշխարհային անվտանգության համար։
«ԵՄ առաջնորդները պետք է կենտրոնանան Ուկրաինայում պատերազմի վրա»,- հայտարարել է ԱՄՆ նախագահը՝ միաժամանակ խուսափելով պատասխանել հարցին, թե արդյոք պատրաստ է ուժ կիրառել Գրենլանդիան վերահսկողության տակ վերցնելու համար։ «Առանց մեկնաբանության»,– այսպես է արձագանքել Թրամփը լրագրողի հարցին։
Մաքսատուրքերի սպառնալիք
Թրամփը հայտարարել է, որ վճռական է եվրոպական երկրների նկատմամբ մաքսատուրքեր սահմանելու հարցում, եթե նրանք չհամաձայնեն Գրենլանդիան ԱՄՆ-ին փոխանցելու շուրջ գործարքի պայմաններին։ Այս հայտարարությունը նոր լարվածություն է հաղորդել արդեն իսկ բարդ ամերիկա-եվրոպական հարաբերություններին։
Քննարկումներ ՆԱՏՕ-ի շրջանակում
ԱՄՆ նախագահի խոսքով՝ Գրենլանդիայի հարցը քննարկվել է նաև ՆԱՏՕ-ի գլխավոր քարտուղար Մարկ Ռյուտեի հետ։ Թրամփը դրական է գնահատել նրանց հեռախոսազրույցը և նշել, որ թեման կքննարկվի նաև Դավոսում նախատեսվող հանդիպումների ընթացքում։
«ԱՄՆ-ը, անկասկած, աշխարհի ամենահզոր երկիրն է։ Մենք միակ երկիրն ենք, որը կարող է խաղաղություն ապահովել ամբողջ աշխարհում, և դա արվում է ուժի միջոցով»,- գրել է Թրամփը իր Truth Social հարթակում։
Սոցիալական ցանցեր և ռազմական արձագանք
Միևնույն ժամանակ, ԱՄՆ նախագահը սոցիալական ցանցերում հրապարակել է արհեստական բանականությամբ գեներացված պատկերներ, որոնցից մեկում նա, փոխնախագահի և պետքարտուղարի ներկայությամբ, Գրենլանդիայում ծածանում է ԱՄՆ դրոշը, իսկ մյուսում՝ հանդիպում է եվրոպացի առաջնորդների հետ քարտեզի ֆոնին, որտեղ Գրենլանդիան ներկայացված է որպես Միացյալ Նահանգների մաս։
Լարված իրավիճակի պայմաններում Դանիան հայտարարել է Գրենլանդիա լրացուցիչ ուժեր ուղարկելու մասին, ինչը վկայում է, որ տարածաշրջանում անվտանգային մտահոգությունները շարունակում են աճել։
