Դիլիջան տանող ճանապարհին նախատեսվում է կառուցել նոր թունել, որի արժեքը կկազմի մոտ 70–80 միլիոն եվրո։ Նախագիծը վերաբերում է Սևան–Դիլիջան ճանապարհահատվածին։
Նոր թունելի նախագծումն արդեն ավարտվել է։ Այն կանցնի գործող Դիլիջանի թունել-ին զուգահեռ, իսկ մուտքերը կտեղակայվեն ներկայիս թունելից մոտ 50 մետր հեռավորության վրա։ Գործարկումից հետո գործող թունելը կվերածվի փախուստի (էվակուացիոն) թունելի։
Ֆինանսավորումը նախատեսվում է իրականացնել Ասիական զարգացման բանկ-ի հետ կնքվելիք նոր վարկային համաձայնագրի շրջանակում։ Նախագիծը մշակվել է ավստրիական ընկերության կողմից։ Շինարարությունը նախատեսվում է տևել շուրջ 4–4.5 տարի։ Մրցույթը կանցկացվի 2026 թվականի երկրորդ կեսին, իսկ շինարարական աշխատանքների մեկնարկը նախատեսվում է 2027 թվականի երկրորդ կեսին։ Նշվում է, որ նոր թունելը լիովին կհամապատասխանի ԵՄ չափանիշներին։
Ինչու է ընտրվել նոր թունելի տարբերակը
Գործող թունելը, որը միացնում է Տավուշի և Գեղարքունիքի մարզերը, անվտանգության տեսանկյունից վերանորոգման խիստ կարիք ունի։ Սակայն հաշվարկների համաձայն՝ դրա արդիականացումը կարժենար 47.5–63 միլիոն եվրո։
Բացի այդ, անհրաժեշտ կլիներ ամբողջությամբ փակել և վերակառուցել շրջանցիկ ճանապարհը, որի արժեքը գնահատվում է ևս 16.3 միլիոն եվրո։ Ընդհանուր առմամբ, արդիականացման ծրագիրը կարժենար 68–83.7 միլիոն եվրո՝ միևնույն ժամանակ ամբողջությամբ չհամապատասխանելով ԵՄ չափանիշներին։
Այս հանգամանքները հաշվի առնելով՝ իշխանությունները որոշել են հրաժարվել գործող թունելի խոշոր վերանորոգումից և ընտրել նոր թունելի կառուցման տարբերակը։
