Հուլիսի 28-ի առավոտյան ռուսական «Աերոֆլոտ» ավիաընկերությունը հայտնել է իր տեղեկատվական համակարգերի խափանումների մասին, ինչի հետևանքով փոփոխվել է չվերթերի ժամանակացույցը, ներառյալ մի շարք չվերթների հետաձգումը կամ չեղարկումը։

Թեև «Աերոֆլոտի» հետ նույն խմբում ընդգրկված «Ռոսիա» և «Պոբեդա» ավիաընկերությունները խափանումներ չեն արձանագրել, Silent Crow հաքերային խումբը հայտարարել է, որ կիբեռհարձակումը իրականացվել է իրենց կողմից՝ բելառուսական ընդդիմադիր Cyberpartisans BY խմբի հետ համագործակցությամբ։

Ըստ հաքերների՝ իրենք կարողացել են ոչնչացնել «Աերոֆլոտի» ամբողջ ներքին տեղեկատվական ենթակառուցվածքը, ձեռք բերել և ներբեռնել թռիչքների պատմության տվյալների բազաներ, վնասել կարևորագույն կորպորատիվ համակարգեր, ինչպես նաև մուտք գործել ավիաընկերության աշխատակիցների համակարգիչներ, ներառյալ ավագ ղեկավարության սարքեր։ Նրանք պնդում են, որ հասանելիություն են ստացել նաև հսկողության համակարգերին, զրույցների ձայնագրություններին և ներքին նամակագրությանը։

Ըստ նախնական գնահատականների՝ հարձակման հետևանքով ոչնչացվել է շուրջ 7000 սերվեր, գողացվել է ավելի քան 20 տերաբայթ տվյալ, իսկ պատճառված վնասը կարող է հասնել տասնյակ միլիոնավոր դոլարների։