Չնայած Apple-ի ֆինանսական բիզնեսի խնդիրներին, աշխարհում խոշորագույն վճարային համակարգերը շարունակում են պայքարել Apple Card-ի հիմնական գործընկեր դառնալու համար։ Visa-ն առաջարկում է 100 միլիոն դոլար, որպեսզի փոխարինի Mastercard-ին՝ պատրաստ լինելով վճարել այս գումարը նախապես, ինչը վճարային շուկայում հազվադեպ երևույթ է, գրում է The Wall Street Journal-ը։

Apple Card-ի նկատմամբ հետաքրքրություն է ցուցաբերում նաև American Express-ը, որը ցանկանում է դառնալ ինչպես էմիտենտ, այնպես էլ վճարային ցանց, փոխարինելով ինչպես Mastercard-ին, այնպես էլ ներկայիս էմիտենտ Goldman Sachs-ին, որը հեռանում է մանրածախ շուկայից։ Նոր էմիտենտի դերի համար պայքարում են նաև JPMorgan, Barclays և Synchrony Financial-ը։

Սա տիպիկ օրինակ է, թե ինչպես տեխնոլոգիական հսկաները ավանդական բանկային համակարգը վերածում են աճուրդային ծառայության։ Իրականում, բանկերն ու վճարային համակարգերը պայքարում են ոչ թե պարզապես քարտի, այլ Apple-ի ռազմավարական էկոհամակարգ մուտք գործելու և միլիոնավոր օգտատերերի տվյալներին հասանելիություն ստանալու համար։

Բացի այդ, Apple-ի հետ համագործակցությունը դարձել է յուրօրինակ տեխնոլոգիական և իմիջային բրենդինգի գործիք։ Ինֆրաստրուկտուրային բաղադրիչները վերածվում են ակտիվների, որոնք օգտագործվում են էկոհամակարգի նկատմամբ վերահսկողություն ապահովելու համար։ Visa, Amex, Goldman Sachs, Barclays, JPMorgan — նրանք Apple-ի մրցակիցները չեն, այլ փոխարինելի «դետալներ», որոնք պետք է համապատասխանեն ընկերության UX-ին և քաղաքականությանը։