Առաջիկա հինգ տարիների ընթացքում Հայաստանի ամենակարևոր առաջնահերթություններից մեկը պետք է լինի ջրային ռեսուրսների կուտակումը և արդյունավետ կառավարումը։ Այս մասին Ազգային ժողովում հայտարարել է վարչապետ Նիկոլ Փաշինյանը՝ պատասխանելով ՔՊ խմբակցության պատգամավոր Սերգեյ Բագրատյան-ի հարցին։
Վարչապետի խոսքով՝ եթե նախորդ տարիների գլխավոր առաջնահերթությունը խաղաղության օրակարգն էր, ապա առաջիկա տարիներին կարևորագույն խնդիրներից մեկը պետք է լինի ջրային ռեսուրսների արդյունավետ օգտագործումը։
Փաշինյանը օրինակ է բերել Վայոց ձոր-ի արևկող լանջերը՝ նշելով, որ այդ տարածքներում հնարավոր է հազարավոր հեկտարներով այգիներ ստեղծել, սակայն դրա համար անհրաժեշտ է ապահովել ոռոգման ջուր։
Նրա խոսքով՝ նման ծրագրերը հնարավոր են միայն այն դեպքում, եթե ջուրը հասանելի լինի և կիրառվեն ինտենսիվ այգեգործության ու ժամանակակից ոռոգման տեխնոլոգիաներ։
Վարչապետը հիշեցրել է, որ 2021 թվականի նախընտրական ծրագրով նախատեսված էր տարեկան 1000 հեկտար ինտենսիվ այգիների ստեղծում, և այդ ցուցանիշը ոչ միայն կատարվել, այլև գերակատարվել է։ Նրա գնահատմամբ՝ այժմ հնարավոր է այդ ցուցանիշը հասցնել տարեկան 2000 հեկտարի։
Միևնույն ժամանակ նա ընդգծել է, որ առանց ջրի կառավարման բարեփոխումների նման աճը հնարավոր չի լինի․ «Փողը կարող է լինել, հողը կարող է լինել, բայց եթե ջուր չկա, ծրագրերը չեն իրականացվի»։
Վարչապետի խոսքով՝ Հայաստանի լեռներում ձևավորվում են բավարար ջրային ռեսուրսներ, սակայն խնդիրն այն է, որ դրանք պետք է արդյունավետ կուտակել և օգտագործել։ Նա նշել է նաև, որ ներկայումս երկրում ջրի մոտ կեսը կորուստների է ենթարկվում։
