Արդյո՞ք հնարավոր է ապրել թունելում։ Ճարտարագիտական տեղեկագրքերում թունելը բնորոշվում է որպես «հորիզոնական կամ թեք ստորգետնյա կառույց, որի երկարությունը զգալիորեն գերազանցում է լայնությունն ու բարձրությունը»։ Այն նախատեսված է հետիոտների, ավտոմեքենաների, գնացքների և նավերի տեղաշարժի համար, բայց ոչ բնակության։
Այնուամենայնիվ, ավստրալական Room11 ճարտարապետական ստուդիայի դիզայներներին հաջողվել է անհնարինը՝ միավորել թունելն ու բնակելի տունը։ Արդյունքում ստեղծվել է Vipp Tunnel անունով յուրահատուկ կառույցը, որը գտնվում է Ավստրալիայի Բրունի կղզում, Տասմանիայի նահանգում։
Ի տարբերություն սովորական թունելների՝ Vipp Tunnel-ը լիովին գտնվում է մակերեսին։ Այն ունի 30 մ երկարություն և 160 քմ ընդհանուր մակերես։ Կողքին կա ևս մեկ շինություն՝ խորանարդի տեսքով, որը նախատեսված է աշխատանքի կամ սպորտով զբաղվելու համար և ներառում է նաև ննջասենյակ։
Հիմնական շինության ներսում ընդարձակ, հարմարավետ և լուսավոր միջավայր է՝ շնորհիվ մեծ պատուհանների և Vipp դիզայնի ստուդիայի ինտերիերի տարրերի։ Կենտրոնական տանիքի լուսամուտները համալրված են գունավոր ապակեպատմամբ, ինչը արևոտ օրերին ստեղծում է բևեռափայլի էֆեկտ։
Vipp Tunnel-ը լիովին էներգաավտոնոմ է. արևմտյան ճակատը պատված է արևային վահանակներով, որոնք միացված են մարտկոցի։ Հարմարավետ կլիման ապահովվում է տաքացվող հատակով և օդորակիչով։ Ջուրն ստացվում է ջրագոյացման համակարգից և ֆիլտրացված օգտագործված ջրից։
Չնայած Vipp Tunnel-ի բետոնե կառուցվածքին՝ այն ներդաշնակորեն միաձուլվում է շրջակա բնապատկերին։ Բրունի կղզու անկրկնելի բնության գրկում մեկ գիշեր անցկացնելու համար անհրաժեշտ է վճարել մոտ 610 ԱՄՆ դոլար։
