Ford Motor-ի գործադիր տնօրեն Ջիմ Ֆարլին կարծում է, որ չինական ավտոարտադրողները «շարժվում են լույսի արագությամբ»՝ խաթարելով մրցակցությունը շուկայում: Գործարարի խոսքով՝ Չինաստանի մրցակիցները «էկզիստենցիալ սպառնալիք» են արևմտյան արդյունաբերության ներկայացուցիչների համար։ Ըստ The Wall Street Journal-ի՝ Չինաստան կատարած մի շարք այցելություններից հետո Ֆարլին ասել է Ford-ի խորհրդի անդամներից մեկին. «Ջոն, սա էկզիստենցիալ սպառնալիք է»: Ամերիկյան ավտոհսկայի ղեկավարը նշել է, որ չինական ընկերությունները օգտագործում են էժան բաղադրիչների մատակարարներ, առաջարկում են հարմար թվային հնարավորություններ և ագրեսիվորեն ընդլայնվում են արտաքին շուկաներ՝ խաթարելով մրցակցությունը։ Ֆարլին ընդգծել է, որ չինացի մրցակիցներն օգտագործում են արհեստական ինտելեկտ և այլ տեխնոլոգիաներ, «որոնք նման չեն ԱՄՆ-ում առկա որևէ այլ բանի»:
«Դա նման չէ այն, ինչ նախկինում էր», – մեջբերում է WSJ-ը Ֆարլիին: «Այս տղաները մեզանից առաջ են»:
2023 թվականի չորրորդ եռամսյակի վերջում ամերիկյան Tesla-ն առաջին անգամ զիջեց չինական BYD-ին էլեկտրական մեքենաների համաշխարհային վաճառքով։ Դրանից հետո Tesla-ի գործադիր տնօրեն Իլոն Մասկը հայտարարեց, որ չինացի ավտոարտադրողները «ոչնչացնում են աշխարհի մյուս ավտոընկերությունները»:
