2027 թվականին Դիլիջանում կկառուցվի Holiday Inn բրենդի ներքո գործող նորագույն առողջարանային կենտրոն։ Այն կստեղծվի ներկայումս գործող «Դիլիջան Ռեզորթ» հյուրանոցային համալիրի հիման վրա։

Նախագծի ներդրումների ծավալը կհասնի շուրջ 7 միլիարդ դրամի (18 մլն ԱՄՆ դոլար), և ակնկալվում է առնվազն 100 նոր աշխատատեղերի ստեղծում՝ Դիլիջանի համայնքի զարգացմանը զուգահեռ։

Նախաձեռնությունը կյանքի կկոչվի հայկական «Դերժավա» ընկերությունների խմբի և միջազգային ճանաչում ունեցող InterContinental Hotels Group-ի Holiday Inn բրենդի համագործակցությամբ։ Սա կլինի առողջարանային և առողջապահական զբոսաշրջության ոլորտում նրանց առաջին համատեղ նախաձեռնությունը Հայաստանում։

Նախագիծը կնպաստի Տավուշի մարզի՝ որպես առողջարար ու էկոլոգիապես մաքուր հանգստի ուղղության զարգացմանը։