ՀՀ սննդամթերքի անվտանգության տեսչական մարմինը հայտնում է, որ ստուգումներ են իրականացվել Կոտայքի մարզի Ջրվեժ գյուղում գտնվող «Դոլչեզա» ՍՊԸ-ին պատկանող պաղպաղակի արտադրամասում։ Ստուգման ընթացքում նմուշառվել և լաբորատոր փորձաքննության է ուղարկվել «Վանիլային պաղպաղակ» տեսակը (արտադրված՝ 15.07.2025թ.)։
Լաբորատոր արդյունքներով՝ արտադրատեսակը չի համապատասխանել սանիտարահիգիենիկ նորմերին, մասնավորապես աղիքային ցուպիկի խմբի մանրէների (ԱՑԽՄ) առկայության ցուցանիշով։
Տեսչական մարմնի ղեկավարի որոշմամբ՝ արտադրամասի տվյալ արտադրատեսակի գործունեությունը կասեցվել է մինչև խախտումների լիարժեք վերացումը։ Բացի այդ, ընկերությանը հանձնարարվել է արգելել տվյալ խմբաքանակի իրացումը, կազմակերպել շուկայից հետկանչ, ոչնչացում կամ օգտահանում։
