Դուբայում ստեղծված տրանսպորտային քաոսը հազարավոր օտարերկրացիների և զբոսաշրջիկների կանգնեցրել է բարդ ընտրության առաջ՝ սպասե՞լ անորոշությանը, թե՞ վճարել հսկայական գումարներ երկրից դուրս գալու համար։ Ինչպես գրում է Daily Mail-ը, Դուբայի միջազգային օդանավակայան-ում թռիչքների զանգվածային չեղարկումներն ու ուշացումները հանգեցրել են մասնավոր չարտերային թռիչքների պահանջարկի շուրջ 55 տոկոս աճի։

Անորոշության պայմաններում որոշ հարուստ ընտանիքներ պատրաստ են վճարել մինչև 260 հազար ֆունտ ստեռլինգ՝ ամբողջ ինքնաթիռ վարձելու համար, կամ մոտ 20 հազար ֆունտ՝ 13 տեղանոց օդանավի մեկ նստատեղի դիմաց, որպեսզի ապահով տեղափոխեն ընտանիքի անդամներին և անգամ ընտանի կենդանիներին։ Դուբայից Լոնդոն մեկ ուղղությամբ մասնավոր թռիչքի արժեքը ներկայումս տատանվում է 80-100 հազար ֆունտի սահմաններում՝ զգալիորեն գերազանցելով սովորական սակագները։

Նրանք, ովքեր նման միջոցներ չունեն, դիմում են ցամաքային այլընտրանքներին։ Շատերը տաքսիներ են վարձում կամ անձնական մեքենաներով ուղևորվում հարևան երկրներ՝ առնվազն վեց ժամ տևողությամբ ճանապարհ անցնելով դեպի Մասկատ կամ Սաուդյան Արաբիայի օդանավակայաններ։ Որոշ դեպքերում մարդիկ ստիպված են լինում հաղթահարել ավելի քան 450 կիլոմետր՝ անապատային պայմաններում, միայն թե գտնեն հասանելի ավիատոմս։

Ավիատոմսերի շուկայում ևս գները կտրուկ աճել են․ նախկինում մի քանի հարյուր ֆունտ արժեցող էկոնոմ դասի տոմսերը այժմ հասնում են հազարավոր դոլարների և, ըստ հրապարակման, գրեթե ակնթարթորեն սպառվում են առցանց հարթակներում։

Ստեղծված իրավիճակը, ըստ աղբյուրի, մարդկանց ստիպում է կայացնել արագ և ծայրահեղ թանկարժեք որոշումներ՝ ընտրելով կա՛մ հազարավոր դոլարների հասնող միջպետական տաքսիներ, կա՛մ մասնավոր չարտերային թռիչքներ։