Google-ը պաշտոնապես ներկայացրել է Genie 3 մոդելը, որը կարող է իրական ժամանակում գեներացնել փոխազդեցիկ թվային միջավայրեր՝ հիմնվելով պարզ տեքստային կամ պատկերային հրահանգների վրա։ Այն ապահովում է HD որակ (720p, 24 կադր/վրկ) և առաջարկում մի շարք նորարարություններ։

Հիմնական նորույթները

• Երկարաժամկետ հիշողություն․ եթե Genie 2-ը կարող էր պահել միջավայրի ամբողջականությունը մինչև 10 վայրկյան, ապա Genie 3-ը պահպանում է օբյեկտներն ու վայրերը մի քանի րոպե, ինչը թույլ է տալիս օգտատերին վերադառնալ նախկինում տեսած հատվածներին։
• Կենդանի խմբագրում․ միջավայրը կարելի է փոփոխել ընթացիկ ռեժիմում՝ տեքստային հրամաններով՝ ավելացնելով օբյեկտներ, փոխելով եղանակը կամ ստեղծելով նոր կերպարներ։

Սահմանափակումներ

Մոդելը դեռ չի կարող ճշգրիտ վերարտադրել իրական միջավայրեր, իսկ մարդկանց շարժումների և տեքստերի պատկերումը երբեմն անճշտություններով է ստացվում։

Genie 3-ը ներկայումս հասանելի է միայն սահմանափակ թվով հետազոտողների՝ փակ փորձարկման փուլում։