Ընկերությունը վստահ է, որ իր նոր քվանտային պրոցեսորը հաշվարկներ է կատարում զուգահեռ աշխարհներում։ Google-ը ներկայացրել է իր նոր քվանտային պրոցեսորը՝ Willow անունով։ Google Quantum AI լաբորատորիայի հիմնադիր և ղեկավար Հարթմուտ Նևենը պնդում է, որ չիպը էականորեն գերազանցում է ինչպես ժամանակակից գերկոմպյուտերների, այնպես էլ այլ քվանտային պրոցեսորների արտադրողականությանը։
Google-ի տվյալներով, 105-կուբիտանոց Willow պրոցեսորը ստանդարտ հաշվարկային բենչմարքը կատարել է հինգ րոպեից պակաս ժամանակում։ Իսկ աշխարհի ամենաարագ գերկոմպյուտերներից մեկին՝ Frontier-ին, նման խնդիր լուծելու համար կպահանջվեր 10 սեպտիլիոն տարի (10 25-րդ աստիճանում)։ Ըստ Google-ի գիտնականների, այս թիվը գերազանցում է Տիեզերքի տարիքին։
Հարթմուտ Նևենը շեշտում է, որ այս թիվը գերազանցում է ֆիզիկայում հայտնի բոլոր ժամանակային մասշտաբները։ Ըստ նրա՝ սա «հաստատում է այն գաղափարը, որ քվանտային հաշվարկները կատարվում են բազմաթիվ զուգահեռ տիեզերքներում» և համապատասխանում է Դևիդ Դոյչի՝ բրիտանացի ֆիզիկոսի, իր «Իրականության կառուցվածքը. Զուգահեռ տիեզերքների գիտությունը» գրքում ներկայացրած բազմատիեզերքների տեսությանը։
Google-ը Willow-ի արտադրողականությունը գնահատելու համար կիրառել է պատահական շղթաների նմուշառման բենչմարքը (Random Circuit Sampling, RCS), որը ցույց է տալիս, թե որքան լավ է քվանտային համակարգիչը կատարում այն խնդիրները, որոնք անհասանելի են սովորական հաշվարկային համակարգերի համար։ Այս թեստը մշակվել է հենց Google-ի կողմից՝ քվանտային գերազանցությունը ցուցադրելու նպատակով։ Սակայն, ընկերությունը չի նշում, թե ինչպես է Willow-ն աշխատում քվանտային հաշվարկների հիմնական խնդիրների՝ օրինակ Շորի ալգորիթմի հետ։
RCS-ի շրջանակներում պատահական լոգիկական գործողություններից գեներացվում է քվանտային շղթա, որը գործարկվում է քվանտային համակարգչում։ Շղթաները նախագծված են այնպես, որ դժվարացնեն դրանց մոդելավորումը սովորական համակարգիչների վրա։ Եթե հաշվարկների արդյունքները մոտ են կամ համընկնում են դասական մոդելավորման արդյունքների հետ, ապա խնդիրն համարվում է կատարված։ Իսկ եթե քվանտային համակարգիչը RCS թեստն անցկացնում է ավելի արագ, քան դասական համակարգիչը, ապա համարվում է, որ այն հասել է քվանտային գերազանցության։
Այնուամենայնիվ, Willow-ի հիմնական առավելությունը ոչ թե արտադրողականությունն է, այլ սխալների հաճախականության նվազեցումը՝ կուբիտների թվի մեծացման հետ միասին։ Google-ը շեշտում է, որ գիտնականները այս խնդրի լուծման ուղիներ են փնտրել գրեթե 30 տարի։
