Հայազգի տեխնոլոգիական ձեռներեց Ռուբեն Իզմայիլյանի հիմնած ամերիկյան Quiltt ստարտափը հաջողությամբ ներգրավել է 2.6 միլիոն դոլարի ներդրում, որի նպատակն է լուծել բաց բանկային ինտեգրման (open banking integration) ոլորտի հիմնական մարտահրավերները։

Quiltt-ը ներկայացնում է «ցածր կոդով» (low-code) հարթակ, որը թույլ է տալիս ֆինտեխ ընկերություններին և ստարտափներին արագ գործարկել ժամանակակից սպառողական ֆինանսական լուծումներ՝ առանց բարդ բեկէնդ (backend) մշակման անհրաժեշտության։

Ընկերության արտադրանքը միավորում է տարբեր տվյալների մատակարարների և բանկային ծառայությունների միևնույն ինտերֆեյսի միջոցով՝ առաջարկելով մեկ API և մեկ ինտեգրում։ Այս մոտեցումը զգալիորեն պարզեցնում է նոր ֆինտեխ արտադրանքների ստեղծման գործընթացը և նվազեցնում տեխնիկական ծախսերը։

«Մեր նպատակն է ֆինանսական նորարարությունը դարձնել հասանելի բոլորի համար՝ անկախ տեխնիկական ռեսուրսներից։ Quiltt-ը նման է “հեշտացման կոճակի”՝ ֆինտեք ոլորտի համար», — նշել է Ռուբեն Իզմայիլյանը։

Նշենք, որ Quiltt-ի լուծումներն արդեն հետաքրքրություն են առաջացրել մի շարք ամերիկյան ֆինտեխ ընկերությունների շրջանում, իսկ ստարտափը պատրաստվում է ընդլայնել իր թիմն ու աշխարհագրությունը։