2025 թվականին Հայաստանը հայտնվել է այն հինգ երկրների շարքում, որտեղ Ռուսաստանի քաղաքացիները առավել հաճախ են նախընտրել ստանալ քաղաքացիություն կամ բնակության թույլտվություն։ Այդ մասին հայտնում է Ռուսաստանի ՆԳՆ մամուլի կենտրոնը։

Պաշտոնական տվյալների համաձայն՝ 2025 թվականի առաջին 11 ամիսների ընթացքում ավելի քան 97 հազար ռուս քաղաքացի տարբեր երկրներում ստացել է քաղաքացիություն կամ բնակության թույլտվություն։ Ցուցանիշը մոտ 12 հազարով նվազել է նախորդ տարվա նույն ժամանակահատվածի համեմատ։

Ռուսաստանի ՆԳՆ հաղորդագրությունում նշվում է, որ նշված ժամանակահատվածում ռուս քաղաքացիները հիմնականում ընտրել են Գերմանիան, Իսրայելը, Իսպանիան, Հայաստանը և ԱՄՆ-ը՝ որպես քաղաքացիություն կամ բնակության իրավունք ստանալու ուղղություններ։

Մասնագետների գնահատմամբ՝ այդ ընտրության վրա ազդեցություն ունեն մի շարք գործոններ՝ միգրացիոն քաղաքականության համեմատաբար ճկուն պայմանները, տնտեսական և սոցիալական միջավայրը, ինչպես նաև տվյալ երկրների հետ պատմական և տարածաշրջանային կապերը։