2025 թվականը ռեկորդային է եղել Հայաստանի արևային էներգետիկայի ոլորտի համար․ երկրում տեղադրված արևային էլեկտրակայանների ընդհանուր հզորությունը հասել է 1.1 ԳՎտ-ի։ Տարածքային կառավարման և ենթակառուցվածքների նախարար Դավիթ Խուդաթյանի տվյալներով՝ տարվա ընթացքում շահագործման է հանձնվել մոտ 615 ՄՎտ նոր հզորություն, ինչը զգալի աճ է նախորդ տարվա ցուցանիշների համեմատ։

Աճը հիմնականում ապահովվել է անկախ արևային էներգիայի արտադրողների հաշվին։ Հայաստանում արդեն գործում է ավելի քան 50 հազար նման կայանք, որոնց համախառն հզորությունը մոտ 650 ՄՎտ է։ Areg.ai-ի տվյալներով՝ 2025 թվականին արևային էներգիան ապահովել է երկրի էլեկտրաէներգիայի արտադրության շուրջ 15 տոկոսը, իսկ բնակելի արևային կայանքների թիվը մեկ տարվա ընթացքում աճել է մոտ 60 տոկոսով։

Այս ցուցանիշների շնորհիվ Հայաստանը ժամանակից շուտ է հասել 2030 թվականի էներգետիկ զարգացման ռազմավարությամբ նախատեսված արևային էներգիայի մասնաբաժնի նպատակին։ Կառավարությունը նախատեսում է առաջիկայում պետական աջակցությունը տանիքային արևային կայանքներից տեղափոխել հիբրիդային նախագծերի և էներգիայի կուտակման համակարգերի զարգացման ուղղությամբ։ Նախատեսվում է, որ մինչև 2040 թվականը արևային և քամու էլեկտրակայանների համակցված հզորությունը կհասնի 2 ԳՎտ-ի։