Հայաստանի բարձր տեխնոլոգիական արդյունաբերության նախարարությունը և ֆրանսիական Mistral AI-ն սկսում են համագործակցություն՝ արհեստական ինտելեկտի (AI) ոլորտում համատեղ նախաձեռնություններն առաջ մղելու համար։ Կողմերը համաձայնագիր են ստորագրել Փարիզում կայացած AI գագաթնաժողովում, որտեղ հավաքվել են 80 երկրների ղեկավարներ։
Փոխնախարար Գևորգ Մանթաշյանը նշեց, որ այս համագործակցությունը կարևոր գործոն է հզոր էկոհամակարգ ստեղծելու համար, որը կգրավի տաղանդավոր մասնագետների և կկիրառի արհեստական ինտելեկտի լուծումները՝ ավելի արդյունավետ և արագ կառավարման համար։
Mistral AI-ի գործադիր տնօրեն Արթուր Մենշն ընդգծել է, որ AI-ի էկոհամակարգը Հայաստանում ծաղկում է, և ընկերությունը հպարտ է աջակցել Հայաստանի պետական կառավարմանը, ստարտափներին և տաղանդներին իր AI լուծումներով։
Համաձայնագիրը նախատեսում է բարելավել Հայաստանում արհեստական ինտելեկտի ենթակառուցվածքը, աջակցել AI-ի վրա հիմնված բիզնես լուծումներին և բարելավել պետական կառավարումը GovTech ծրագրի միջոցով՝ օգտագործելով Mistral AI-ի առևտրային և բաց կոդով AI տեխնոլոգիաների փորձը:
Ակնկալվում է, որ փաստաթուղթը Հայաստանին հնարավորություն կտա դառնալու AI-ի էկոհամակարգի առանցքային խաղացողը տարածաշրջանում՝ խթանելով նորարարությունն ու տեխնոլոգիական առաջընթացը։ Փաստաթուղթը նպատակ ունի ամրապնդել Հայաստանում արհեստական ինտելեկտի էկոհամակարգը՝ տեխնիկական աջակցության և գիտելիքների փոխանակման, բիզնես լուծումների մշակման համար արհեստական ինտելեկտի հարթակ տրամադրելու և կառավարման և ծառայությունների մատուցման արդյունավետությունը բարելավելու համար AI գործիքների օգտագործմանն աջակցելու միջոցով։
Որպես պետական և մասնավոր հատված համագործակցության մաս, Հայաստանի կառավարությունը կտրամադրի ենթակառուցվածքային և կարգավորող աջակցություն, մինչդեռ Mistral AI-ն կկիրառի իր փորձը, կանցկացնի դասընթացներ և կառաջարկի նպատակային AI լուծումներ Հայաստանում:
