Հայաստանը նախնական համաձայնության է եկել չինական Temu էլեկտրոնային առևտրի հարթակի հետ, որը թույլ կտա հայ արտադրողներին իրենց ապրանքները վաճառել միջազգային շուկայում։

Էկոնոմիկայի նախարար Գևորգ Պապոյանի խոսքով՝ նախատեսվում է, որ սեպտեմբերից կմեկնարկի փորձաշրջան հայկական ընկերությունների համար, սակայն համագործակցության տեխնիկական և առևտրային մանրամասները դեռ չեն հրապարակվել։

Ներկայումս Հայաստանի սպառողները կարող են օգտվել Temu-ից գնումներ կատարելու համար, սակայն տեղական արտադրողների համար վաճառքի հնարավորությունը սահմանափակ էր։ Նոր համաձայնությունը, ըստ պաշտոնական հայտարարությունների, կարող է հայկական բիզնեսներին հասանելի դարձնել միջազգային բազմաթիվ շուկաներ։

Ընկերության տվյալներով՝ Temu-ի ամենամեծ շուկան ԱՄՆ-ն է, իսկ հարթակը լայնորեն օգտագործվում է նաև Միացյալ Թագավորությունում, Գերմանիայում, Ֆրանսիայում, Ավստրալիայում և Կանադայում։