Հայաստանի Ազգային ժողովը ընդունել է նոր օրինագիծ, որը կարգավորում է կրիպտոակտիվների շուկան՝ սահմանելով հստակ կանոններ և պահանջներ այս ոլորտում գործող ընկերությունների համար։
Նոր օրենքի համաձայն՝ ներդրումներ կատարող, կրիպտոակտիվներով առևտուր իրականացնող և համապատասխան ծառայություններ մատուցող ընկերությունները կկարգավորվեն՝ ելնելով իրենց գործունեության տեսակից։
Ինչպես նշել է ՀՀ Կենտրոնական բանկի փոխնախագահ Արմեն Նուրբեկյանը, պահանջները տարբեր կլինեն ըստ գործունեության ուղղության։ Օրինակ՝ ներդրումային խորհրդատվության համար սահմանված պահանջներն ավելի մեղմ կլինեն, մինչդեռ կրիպտո բորսաների օպերատորները և կայուն մետաղադրամների (stablecoins) մատակարարները պետք է համապատասխանեն ավելի խիստ չափանիշների՝ հաշվի առնելով հաճախորդների հաշիվների անվտանգության բարձր պահանջները։
Նուրբեկյանը նաև նշել է մի կարևոր փոփոխություն, որ կատարվել է օրենքի առաջին և երկրորդ ընթերցումների միջև․
«Եթե նախկինում ենթադրվում էր, որ բանկերը կարող են կրիպտոարժույթով ծառայություններ մատուցել՝ ԿԲ-ից լրացուցիչ թույլտվություն ստանալով, ապա այժմ պահանջվում է, որ նրանք ստեղծեն առանձին իրավաբանական անձ՝ նոր լիցենզիայի հիման վրա»։
Այս փոփոխությունը միտված է խստացնելու վերահսկողությունը և կանխելու ռիսկերն այն ոլորտներում, որտեղ գործում են բարդ ֆինանսական գործիքներ և մեծ ֆինանսական հոսքեր։
