Չինաստանի պատասխան մաքսատուրքերը կարող են ազդել ԱՄՆ տնտեսության այն ոլորտների վրա, որոնք ապահովում են 400,000-ից 700,000 աշխատատեղ: Ընդ որում, այդ աշխատատեղերի մեծ մասը գտնվում է այն օկրուգներում, որտեղ նախագահական ընտրություններում հաղթել է Դոնալդ Թրամփը։
Հարց է առաջանում. ինչու՞ Թրամփը առհասարակ վարում է առևտրային պատերազմներ, եթե դրանք միայն բերում են գների բարձրացման սպառողների համար և լրացուցիչ ծախսերի՝ արտահանողների համար։
Սովորաբար այս հարցին պատասխանում են, որ երկարաժամկետ հեռանկարում պրոտեկցիոնիզմը (պաշտպանողական տնտեսական քաղաքականությունը) թույլ կտա վերածնել ամերիկյան արտադրությունը և վերակենդանացնել տնտեսական որոշ ոլորտներ։
Սակայն ժամանակակից պայմաններում բարձր տեխնոլոգիական արտադրության ամբողջական շղթայի ստեղծումը չափազանց բարդ խնդիր է, որը պահանջում է մեծ ներդրումներ և ժամանակ։ Բացի այդ, Թրամփը, դատելով իր հայտարարություններից, մտադիր է վերակենդանացնել ոչ միայն բարձր տեխնոլոգիական արտադրությունը, այլև ավանդական արդյունաբերությունը։ Բայց ԱՄՆ-ի պայմաններում դա կպահանջի ոչ միայն միջոցներ և ժամանակ, այլև, ի վերջո, կարող է ֆինանսապես ոչ շահավետ լինել։ Դրանից բացի, ամերիկացիները դժվար թե զբաղվեն այդ գործով։
Կա նաև մեկ այլ վարկած. մաքսատուրքերի միջոցով Թրամփը փորձում է երկրներին ստիպել զիջումների գնալ այն ոլորտներում, որոնք ուղղակիորեն կապված չեն առևտրի հետ։ Այս տեսանկյունից Թրամփի տրամաբանությունը հասկանալի է։
Սակայն Չինաստանի պարագայում մաքսատուրքերի միջոցով ճնշում գործադրելը արդյունավետ չէ. Չինաստանի տնտեսությունը չափազանց մեծ է դրա համար։
Վերջերս լսեցի երրորդ վարկածը. Թրամփը մաքսատուրքերից ստացված գումարով ցանկանում է կրճատել բյուջեի դեֆիցիտը, որը կարող է աճել 2017 թվականի հարկային բարեփոխումների պայմանների երկարաձգման հետևանքով (այդ բարեփոխմամբ կորպորատիվ հարկը 35%-ից նվազեցվեց 21%-ի)։ Բացի այդ, նախընտրական քարոզարշավի ընթացքում Թրամփը խոստացել էր այդ հարկը նվազեցնել մինչև 15%՝ ԱՄՆ-ում արտադրություն ունեցող ընկերությունների համար։
Կոնգրեսի բյուջետային վարչության տվյալներով՝ 2017 թվականի հարկային բարեփոխումների պայմանների երկարաձգումը կարող է առաջիկա 10 տարիների ընթացքում բյուջեի դեֆիցիտը ավելացնել 4.9 տրիլիոն դոլարով։ Սակայն CBS News-ի հաշվարկներով՝ 10%-անոց ընդհանուր մաքսատուրքերի (ոչ միայն Չինաստանի նկատմամբ) ներդրումը կարող է նույն ժամանակահատվածում տնտեսությանը բերել 1.9 տրիլիոն դոլար։
