ՀՀ կառավարությունը նախատեսում է բարեփոխել բազմազավակ ընտանիքների աջակցության համակարգը, փոխարինելով ծնողական կապիտալի միանվագ վճարումները ամսական պարբերական աջակցությամբ։
Աշխատանքի և սոցիալական հարցերի նախարար Արսեն Թորոսյանի խոսքով՝ իրականացված մոնիթորինգը ցույց է տվել, որ ընտանիքների համար փոքր, բայց կանոնավոր աջակցությունն ավելի արդյունավետ է, քան մեկանգամյա մեծ վճարումները։ Այս մոտեցման արդյունավետությունը արդեն հաստատվել է՝ երրորդ և հաջորդ երեխաների համար մինչև 6 տարեկան դրվող ամսական 50,000 դրամի նպաստի փորձով։
Բարեփոխման նախագծով քննարկվում է՝
- ամսական 50,000 դրամի վճարումը երկարացնել մինչև երեխայի 18 տարեկանը,
- և միաժամանակ ծննդյան միանվագ նպաստները հավասարեցնել 500,000 դրամի՝ անկախ երեխայի հերթականությունից։
Ներկայումս ծննդյան միանվագ վճարները կազմում են 300,000 դրամ՝ առաջին և երկրորդ երեխայի, և մինչև 1,5 միլիոն դրամ՝ հինգերորդ և հաջորդների համար։
Նախագծվող փոփոխությունների նպատակն է ապահովել ընտանիքների ֆինանսական կայունությունն ու երկարաժամկետ սոցիալական աջակցությունը։
