Ռուսաստանի խոշորագույն նավթային ընկերություններից մեկը՝ «Լուկօյլ»-ը, հայտարարել է, որ պատրաստվում է վաճառել իր միջազգային ակտիվները՝ կապված ԱՄՆ-ի և մի շարք այլ երկրների կողմից սահմանված նոր պատժամիջոցների հետ։
Ընկերության պաշտոնական հայտարարության մեջ նշվում է.
«Սկսվել է պոտենցիալ գնորդների առաջարկների վերանայումը՝ որոշակի երկրների կողմից ընկերության և իր դուստր ձեռնարկությունների նկատմամբ կիրառված սահմանափակող միջոցառումների պատճառով»։
Ակտիվների վաճառքը կիրականացվի ԱՄՆ ֆինանսների նախարարության արտասահմանյան ակտիվների վերահսկողության գրասենյակի (OFAC) հատուկ լիցենզիայի շրջանակում, որը կարգավորում է «Լուկօյլ»-ի և «Ռոսնեֆտ»-ի հետ կապված գործարքների աստիճանական դադարեցումը։
Հիշեցնենք, որ հոկտեմբերի 22-ին ԱՄՆ ֆինանսների նախարարությունը հայտարարել էր Ռուսաստանի դեմ լրացուցիչ պատժամիջոցների մասին՝ պատճառաբանելով, որ Մոսկվան «չի ցուցաբերում իրական հետաքրքրություն Ուկրաինայում խաղաղության գործընթացի նկատմամբ»։
Այս քայլը, մասնագետների գնահատմամբ, կարող է էական ազդեցություն ունենալ «Լուկօյլ»-ի միջազգային գործունեության վրա՝ հատկապես Եվրոպայում և Ասիայում իրականացվող նախագծերում։
