ՀՀ կառավարությունը հինգշաբթի օրը կայացած նիստում հաստատել է Մարտունի համայնքում սիրողական սպորտի զարգացման ծրագիրը։ Նախաձեռնությունը կիրականացվի պետական-մասնավոր գործընկերության ձևաչափով և նպատակ ունի խթանել մասսայական սպորտի տարածումը, բարձրացնել քաղաքացիների ֆիզիկական ակտիվությունը և խորացնել առողջ ապրելակերպի մշակույթը։
Ծրագրով նախատեսվում է Մարտունիում կառուցել ժամանակակից և միջազգային ստանդարտներին համապատասխանող մարզական համալիր, որը կունենա․
- խաղային սպորտաձևերի դահլիճ,
- լողավազան,
- ֆիթնես կենտրոն։
Կառավարությունից տեղեկացնում են, որ Մարտունիում մեկնարկող ծրագիրը լինելու է մարզի համապարփակ զարգացման բաղադրիչներից մեկը։ Նմանատիպ համալիրների կառուցում նախատեսվում է նաև Գեղարքունիքի մարզի այլ քաղաքներում՝ ապահովելով մարզաբնակների համար նոր հնարավորություններ ակտիվ և առողջ կենսակերպ վարելու համար։
