Դրա հիմնական նպատակն է ցույց տալ Հայաստանի պատրաստակամությունը Եվրամիության հետ մերձեցման ուղղությամբ գործնական աշխատանքի համար։
«Մենք պետք է մշակենք գործողությունների ծրագիր և հասկանանք, թե ինչպես ենք մենք տեսնում այս գործընթացը, ինչպես նաև ինչպես է այն տեսնում Եվրամիությունը: Այս ճանապարհի բազմաթիվ ասպեկտներ կան, որոնք պահանջում են մանրամասն քննարկում: Միայն բանակցություններից հետո պարզ կդառնա, թե արդյոք ԵՄ-ին անդամակցելու հարցը պետք է դրվի հանրաքվեի»,- ասաց Փաշինյանը։
Վարչապետը նաև նշել է, որ ԵՄ-ի հետ համագործակցությունն արդեն իսկ տալիս է կոնկրետ արդյունքներ։ Այս համատեքստում նա, մասնավորապես, հիշեցրել է վիզաների ազատականացման շուրջ բանակցությունների մեկնարկը, ինչպես նաև Հայաստանի միանալը Խաղաղության եվրոպական գործիք ծրագրին։ Թեև այս ծրագրով ֆինանսական և տեխնիկական աջակցության ծավալը դեռ փոքր է, սակայն դրա քաղաքական նշանակությունը, ըստ Փաշինյանի, չափազանց մեծ է։
Միաժամանակ Փաշինյանն ընդգծել է, որ ԵՄ-ին հնարավոր անդամակցության շուրջ քննարկումները չպետք է ավելորդ լավատեսություն կամ ավելորդ լարվածություն առաջացնեն։ «Բոլոր որոշումները պետք է կայացվեն բացառապես հաշվի առնելով դրանց համապատասխանությունը Հայաստանի ազգային շահերին»։
Ելույթ ունենալով հանդիպմանը` Հայաստանի արտգործնախարար Միրզոյանն ընդգծել է, որ կառավարությունը խորհուրդ է տալիս աջակցել օրինագծին։ Այս որոշումը, ըստ նրա, հիմնված է նրանով, որ վերջին տարիներին Հայաստանի և Եվրամիության հարաբերությունները դինամիկ և ինտենսիվ զարգացել են։ Նախարարը նաև նշել է, որ Եվրամիությունը բազմիցս քաղաքական աջակցություն է հայտնել Հայաստանի կառավարությանը և մասնակցել նաև տարածաշրջանում անվտանգության ապահովմանը` նկատի ունենալով Ադրբեջանի հետ Հայաստանի սահմանին ԵՄ քաղաքացիական դիտորդական առաքելությանը։
