Փարաքար համայնքում մեկնարկել է նոր կրթական նախաձեռնություն․ բացվել է Ստեղծագործական տեխնոլոգիաների քոլեջը, որտեղ շուտով կգործի նաև Apple Academy-ն։ Նախագծի նախաձեռնողը Գյումրու տեխնոլոգիական կենտրոնն է (GITC), իսկ ֆինանսավորումը իրականացվել է Նշան և Աիդա Կարայանների կողմից։
Քոլեջը համադրում է տեխնոլոգիաները, արվեստը և ճարտարագիտությունը՝ առաջարկելով կրթություն երեք հիմնական ոլորտում․
- համակարգչային գիտություն՝ շեշտադրմամբ արհեստական բանականության և կիբերանվտանգության վրա,
- թվային արվեստ՝ ավանդական արվեստի և նորարարական թվային հմտությունների համադրմամբ,
- ճարտարագիտություն և արտադրություն։
Նորաստեղծ հաստատությունը կդառնա Apple կրթական ակադեմիայի հարթակ՝ հագեցած ապրանքանիշի ժամանակակից համակարգչային սարքավորումներով։ Բացի այդ, կնքվել է համագործակցություն Կոլումբիայի համալսարանի հետ, որի շնորհիվ քոլեջի լավագույն ուսանողները արդեն հաջորդ տարվանից հնարավորություն կունենան անվճար մասնակցել ճարտարագիտական դասընթացների արտասահմանում։
