Կառավարության նիստում վարչապետ Նիկոլ Փաշինյանն անդրադարձավ վարորդական վկայականների տրամադրման մեխանիզմներին՝ ներկայացնելով իր անձնական օրինակը․
«Ես, ,բնականաբար կաշառք չեմ տվել։ Այն ժամանակ, որ վկայականը ստանում էի, հայտնի լրագրող էի, աղաչեի էլ՝ ինձ չէին թողնի՝ քննություն տամ։ Տարածքից մոտ 300 մետրի վրա, բերին, տվեցին, ասեցին՝ շուտ գնա այստեղից, գործ չունես մեզ հետ»,- ասաց Փաշինյանը։
Նրա խոսքով՝ քաղաքացիների հետ հանդիպումներից մեկի ժամանակ հարցրել է՝ կարո՞ղ ենք պնդել, որ վարորդների 70%-ը չունի այն հմտությունները, որոնք անհրաժեշտ են մեքենա վարելու համար․
«Բոլորը միանգամից արձագանքեցին՝ 95%-ը։ Ասացի՝ ես չէի ուզում տենց սուր ասեի։ Ասացի՝ դահլիճում մարդ կա՞, որ պատշաճ ձևով քննություն է հանձնել և վարորդական իրավունք ստացել, 2-3 կին կային, որ վերջերս են պրոցեսը սկսել, լավ ծանոթ չունեն, ըստ ամենայնի, ասացին՝ հա, մենք կտրվել ենք, չարչարվում ենք»,- ասաց Փաշինյանը։
Նրա խոսքով՝ նույնատիպ վիճակ է նաև այլ ոլորտներում։
«Եկեք, ի վերջո, խոստովանենք, որ ամեն տեղ այդ նույն վիճակն է՝ ներառյալ կառավարման համակարգում։ Իսկ եթե կարելի է նույն կերպ մեքենա քշել, ինչի չի կարելի նույն կերպ լինել կառավարության անդամ, քննիչ, պետական պաշտոնյա։ Ո՞վ է ասել»,- նշեց Փաշինյանն՝ ընդգծելով, որ երկրում կադրային ճգնաժամ է։
