Ըստ «Հայկական Կարիտաս» ընկերության փորձագետ Տաթևիկ Բեժանյանի՝ նոր կարգավորումներ են սահմանվելու ոչ վիզային ռեժիմի երկրների քաղաքացիների մուտքի համար։ Մասնավորապես, նախատեսվում է, որ հունիսի 30-ից վերը նշված երկրների քաղաքացիները պետք է անցնեն գրանցման ընթացակարգ նույնականացման ու վավերացման միասնական համակարգում։ Քաղաքացիների գրանցման համար ստեղծվելու է միասնական պորտալի բջջային հավելված՝ RuID.
«Քաղաքացին պարտավոր է լինելու, անկախ ՌԴ մեկնելու նպատակից, մեկնելուց ոչ ուշ, քան 72 ժամ առաջ, իսկ արտակարգ դեպքերում՝ ոչ ուշ, քան 4 ժամ առաջ, այդ հավելվածի միջոցով տեղյակ պահել երկիր մուտք գործելու ժամկետների մասին: Բջջային հավելվածում անձն իր համար բացելու է էջ, որտեղ լրացնելու է իր տվյալները և դիմում է ներկայացնելու այն մասին, որ պատրաստվում է 72 ժամ հետո մուտք գործել Ռուսաստան»։
Դիմում ներկայացնելուց հետո ՌԴ պատկան մարմինների կողմից ստուգվելու են քաղաքացու տվյալները, և եթե նրա մուտքը թույլատրվի, նա կստանա համապատասխան կոդ, որը սահմանին կներկայացնի սահմանապահին։ Առանց այդ կոդի՝ օտարերկրացուն թույլ չեն տա մուտք գործել Ռուսաստան։
Երկիր մուտք գործելուց 72 ժամ առաջ տեղեկացնելու կարգը վերաբերվելու է բոլոր ոչ վիզային, այդ թվում՝ ԵԱՏՄ անդամ երկրների քաղաքացիներին։
«Ռուսաստանը ոչ վիզային երկրների քաղաքացիների պարագայում ստեղծում է յուրօրինակ «վիզային մեխանիզմ»»,- ասել է նա՝ հավելելով, որ խոսքը ցանկացած պարագայում օտարերկրյա քաղաքացու՝ ՌԴ մուտք գործելու մասին է։
Համապատասխան բջջային հավելվածը դեռ մշակվում է։
