ՀՀ Ներքին գործերի նախարարությունը, Հայաստանի տեղեկատվական համակարգերի գործակալության հետ համագործակցությամբ, հայտարարում է, որ սեպտեմբերի 1-ից քաղաքացիները կկարողանան իրականացնել տրանսպորտային միջոցների առքուվաճառքը առցանց՝ առանց այցելելու հաշվառման-քննական ստորաբաժանումներ։
Նոր ծառայությունը ներդրվում է «Ունենալ և վարել ավտոմեքենա» կյանքի իրադարձության թվայնացման ծրագրի շրջանակում և նպատակ ունի պարզեցնել ու կատարելագործել տրանսպորտային միջոցների ձեռքբերման, վաճառքի և գրանցման գործընթացները։
Քաղաքացիները կկարողանան․
- գործարքը կնքել րոպեների ընթացքում՝ խնայելով ժամանակը,
- խուսափել հերթերից ու ավելորդ ծախսերից,
- ամբողջությամբ բացառել թղթաբանությունը։
Առցանց գործարքի հիմնական պայմանները․
- Գործարքը սկսում է վաճառողը։
- Վաճառվող մեքենան կարող է ունենալ միայն հերթական կամ ցանկալի պետհամարանիշ։
- Գնորդը պետք է ունենա վարորդական վկայական։
- Գործարքի երկու կողմերն էլ անցնում են խիստ նույնականացում՝ «ԵսԵմ» համակարգի միջոցով։
- Մեքենայի համարանիշը չի փոփոխվում․ վաճառողը պարզապես հանձնում է այն գնորդին։
- Վճարման պահին ինքնաշխատ հաշվարկվում են հարկերն ու տուրքերը։
Նախնական փուլում ծառայությունից կարող են օգտվել միայն երկու անհատներ՝ վարորդական վկայական ունենալու պայմանով։
Բացի այդ, սեպտեմբերի 1-ից կներդրվեն նաև վարորդական վկայականի և հաշվառման վկայագրի թվային տարբերակները։ Դրանք հասանելի կլինեն օգտատիրոջ անձնական էջում՝ Roadpolice.am կայքում։ Թվային փաստաթղթերը կտրամադրվեն առանց հավելյալ դիմումների կամ վճարների։
Ծառայությունը հասանելի է Roadpolice.am կայքում կամ hartak.am հարթակում։
