ԱՄՆ փոխնախագահ Ջեյմս Դ. Վենսը անդրադարձել է Հայաստանում Firebird AI տվյալների կենտրոնի նախագծին՝ ընդգծելով դրա տեխնոլոգիական և տնտեսական նշանակությունը։
Նրա խոսքով՝ նախագիծը կարևոր տեխնիկական համաձայնագիր է, որը Միացյալ Նահանգները հաստատել է ամերիկյան NVIDIA ընկերության համար։
«Սա հիանալի տեխնիկական համաձայնագիր է, որը Միացյալ Նահանգները հպարտությամբ հաստատեց NVIDIA-ի համար։ Սա նոր շուկաներ և աշխատատեղեր է բացում ինչպես ամերիկյան ընկերությունների, այնպես էլ աշխատողների, ինչպես նաև Հայաստանի համար», – նշել է Վենսը։
ԱՄՆ փոխնախագահը նաև ընդգծել է, որ խոսքը բարձրակարգ տեխնոլոգիաների մասին է, որոնց հասանելիություն աշխարհի մեծ մասը չունի։
«Մենք խոսում ենք չիպերի մասին, որոնց աշխարհի մեծ մասը հասանելիություն չունի և չի կարող ունենալ։ Այժմ այս տեխնոլոգիաները կտեղակայվեն և կօգտագործվեն Հայաստանում, և դրանք արդեն սկսում են տեղակայվել այստեղ», – հավելել է նա։
