Վերջին շրջանում քննարկվում է այն հարցը, թե ադրբեջանական բենզինի մուտքը հայկական շուկա արդյո՞ք կարող է էականորեն նվազեցնել վառելիքի գները։ Փորձենք մոտավոր հաշվարկներով գնահատել հնարավոր սցենարը։
AI-95 տեսակի բենզինի մանրածախ գինը Ադրբեջանում ներկայում կազմում է մոտ 0.65 դոլար մեկ լիտրի համար։ Նույնիսկ եթե արտահանման գինը լինի որոշ չափով ավելի ցածր, լոգիստիկ ծախսերը՝ ներառյալ երկաթուղային փոխադրումը, բեռնաթափումը և վերալցավորումը, կարող են ավելացնել միջինում մոտ 0.10 դոլար մեկ լիտրի վրա։ Այսպիսով, Հայաստանի սահմանին բենզինի ինքնարժեքը կհասնի մոտ 0.75 դոլարի մեկ լիտրի համար։
Այնուհետև կիրառվում են հայկական հարկային և մաքսային վճարումները՝ ավելացված արժեքի հարկը, մաքսային ձևակերպումները և այլ պարտադիր ծախսեր, որոնք ընդհանուր առմամբ կարող են կազմել ևս 20–30 տոկոս։ Դա նշանակում է հավելյալ 0.18–0.22 դոլար մեկ լիտրի հաշվով։
Այս հաշվարկներով՝ ներմուծված բենզինի գինը Հայաստանում, մինչև բենզալցակայան հասնելը, կկազմի մոտ 0.90–1.00 դոլար մեկ լիտրի համար։ Մեծածախ վաճառողների և բենզալցակայանների շահույթի մարժան ավելացնելուց հետո մանրածախ գինը կարող է ձևավորվել 1.10–1.30 դոլարի սահմաններում, ինչը դրամական արտահայտությամբ մոտավորապես 420–495 դրամ է մեկ լիտրի համար։
Տնտեսագիտական հաշվարկները ցույց են տալիս, որ ադրբեջանական բենզինի ներմուծումը դժվար թե դառնա շուկան կտրուկ էժանացնող գործոն։ Առավել հավանական է, որ այն կհասնի գնային համարժեքության ներկայիս առաջարկների հետ կամ լավագույն դեպքում կհանգեցնի աննշան նվազման՝ ներկայիս մոտ 520 դրամի սահմաններում գտնվող գների համեմատ։
