Երևանի քաղաքապետարանի նախաձեռնությամբ մայրաքաղաքում վերջին շրջանում կատարվել են մի շարք փոփոխություններ երթևեկության կազմակերպման մեջ։ Դրանց հիմնական նպատակը հասարակական տրանսպորտի աշխատանքի արդյունավետության բարձրացումն է՝ այն դարձնելով ավելի հասանելի և ժամանակին սպասարկող։

Քաղաքապետարանի տրանսպորտի վարչության պետ Հայկ Կոստանյանի խոսքով՝ նման լայնածավալ բարեփոխումների արդյունքում որոշ հատվածներում երթևեկությունը դարձել է ավելի հագեցած, ինչը բնական գործընթաց է։ Նա նշել է, որ քաղաքապետարանը շարունակում է իրավիճակի մշտադիտարկումը՝ նպատակ ունենալով անհրաժեշտության դեպքում կատարել լրացուցիչ կարգավորումներ և ապահովել երթևեկության առավել հավասարակշռված կազմակերպում։

Փոփոխությունները հատկապես վերաբերում են հասարակական տրանսպորտի համար հատուկ գոտիների ընդլայնմանը, լուսացույցային նոր համակարգերի ներդրմանը և կանգառների վերադասավորմանը։