Վերջերս Եվրոպայում արձանագրված ուժեղ շոգի հետևանքով 12 քաղաքներում մոտ 2300 մարդ է մահացել։ Այս մասին հայտնում է Reuters-ը՝ հղում անելով արագ գիտական վերլուծության արդյունքներին։
Վերլուծության մեջ ընդգրկվել է հունիսի 23-ից հուլիսի 2-ն ընկած ժամանակահատվածը, երբ հատկապես Արևմտյան Եվրոպան էր տուժել։ Իսպանիայում ջերմաստիճանը հասել է 40°C-ի, իսկ Ֆրանսիայում բռնկվել են հրդեհներ։
Գիտնականները նշել են, որ շուրջ 1500 մահվան դեպք ուղղակիորեն կապ ունի կլիմայի փոփոխության հետ, քանի որ շոգը դարձել է ավելի երկարատև և վտանգավոր։ Ուսումնասիրության շրջանակում ուսումնասիրվել են Բարսելոնան, Մադրիդը, Լոնդոնը և Միլանը, որտեղ ջերմաստիճանն աճել է մինչև 4 աստիճանով։
Հետազոտությունն իրականացվել է գոյություն ունեցող մոդելների և մահացության տվյալների հիման վրա՝ պարզելու, թե շոգը ինչ ազդեցություն է ունեցել մարդկանց մահվան վրա։ Գիտնականները հավելում են, որ շատ երկրներում նման տվյալներ չեն հրապարակվում կամ չեն հավաքագրվում, ուստի վերլուծությունը կատարվել է արագ, բայց վստահելի մեթոդներով։
ԵՄ Կոպերնիկոսի կլիմայի ծառայության տվյալներով՝ այս տարվա հունիսը դարձել է երրորդ ամենաշոգ հունիսը Եվրոպայում՝ զիջելով միայն 2023 և 2024 թվականներին։ Արևմտյան Եվրոպայում գրանցվել է երբևէ ամենատաք հունիսը՝ ջերմաստիճանը շատ վայրերում գերազանցել է 38 աստիճանը, ինչը գնահատվել է որպես «ծայրահեղ շոգի ստրես»։
