YouTube վիդեոհոսթինգը կհատկացնի 24,5 միլիոն դոլար՝ ԱՄՆ նախկին նախագահ Դոնալդ Թրամփի կողմից ներկայացված դատական հայցը համաձայնագրով կարգավորելու համար։

Հայտնի է, որ գումարի հիմնական մասը՝ շուրջ 22 միլիոն դոլար, կփոխանցվի «Trust for the National Mall» կազմակերպությանը, որը պատասխանատու է Սպիտակ տանը նախատեսվող նոր դահլիճի կառուցման համար։ Մնացած 2,5 միլիոն դոլարը կբաշխվի գործի մյուս հայցվորների միջև, որոնց թվում են գրող Նաոմի Վուլֆը և Ամերիկյան պահպանողական միությունը։

Հիշեցնենք, որ Թրամփի հաշիվները YouTube-ում, ինչպես նաև Facebook-ում և Instagram-ում արգելափակվել էին 2021 թվականի հունվարի 6-ի Կապիտոլիումի անկարգություններից հետո։ Սոցցանցերի ղեկավարությունը հայտարարում էր, որ նախագահական ընտրությունների արդյունքներից դժգոհ Թրամփի կողմնակիցների գործողություններին նա նպաստել է իր հրապարակումներով։

Թրամփը, սակայն, պնդում էր, որ իր նկատմամբ կիրառված սահմանափակումները քաղաքական բնույթ էին կրում և խախտում էին խոսքի ազատության իրավունքը։ Դատական գործընթացն ընթացել է մի քանի տարի, իսկ վերջնական համաձայնագիրը թույլ է տվել խուսափել երկարատև նոր դատավարություններից։

Փորձագետների կարծիքով՝ այս գործարքը կարող է նախադեպային դառնալ տեխնոլոգիական հսկաների և հանրային գործիչների միջև ծագող նմանատիպ վեճերի կարգավորման գործում։